( اسماء مخادعة )
القفص لو من دهب ومزوق ببنور -- لا حرية ولا رحب حتى اسئالو العصفور
فاكرينه بيغنى للعدالة مسرور -------------------- سعيد متهنى والحالة زهور
اتاريه بيصرخ من الظلم مقهور --------------- حواشيه بتنفخ من الهم والجور
لو معنى الرواية ضايع فى الحديت ---------- اصل الحكاية شايع بين السطور
لا سمعنا الحداية بترمى كتاكيت ---------------- ولا سمعنا عن وداعة النسور
وياما فى الجراب اسامى حواديت -------------- وحماس حامى وكلام مغرور
هتجنى غير السراب ايه من غيط --------- ماكانلوش غير اللوع والخداع بذور
تسمى القصير نخلة ومهزوم منصور ---- تفضل الغفلة غفلة و لو سموها حبور
والمتعوس متعوس و لو سموه سرور ---- والغولة غولة ولو سموها بدر البدور
دا لو الاسماك طارت مع الطيور ---------- و لوالطيور عامت وسكنت البحور
لاعمر الحق يتغير مهما كان مغمور ---- ولا الضلمة تنور حتى لو سموها نور
بقلمى يوسف ونيس مجلع
ليست هناك تعليقات:
إرسال تعليق